Абвясцілі лаўрэатаў беларускай прэміі кінакрытыкаў «Чырвоны верас»

28 лютага ў Kino Luna ў Варшаве адбылася цырымонія ўзнагароджання трэцяй эдыцыі Беларускай прэміі кінакрытыкаў «Чырвоны верас». Падчас імпрэзы сталі вядомыя пераможцы ў 15 намінацыях. Іх вызначыла журы з 20 кінакрытыкаў, кінажурналістаў і кінадаследнікаў.

Узнагароды «Чырвоны верас». Фота прадастаўлена арганізатарамі

Усяго ў разглядзе бралі ўдзел 60 стужак — гэта поўна- і кароткаметражныя ігравыя, дакументальныя і анімацыйныя стужкі, створаныя беларусамі.  Упершыню асобна разглядаліся дакументальныя рэпартажы.

Галоўную ўзнагароду ў катэгорыі «Найлепшы ігравы поўнаметражны фільм» атрымала стужка «Пад шэрым небам» Мары Тамковіч. Выканаўца галоўнай ролі Валянцін Напольскі прызнаны найлепшым акцёрам, а Аляксандра Вайтэховіч стала найлепшай актрысай.

Мара Тамковіч на ўручэнні прэміі «Чырвоны верас». Фота прадастаўлена арганізатарамі

Нагадаем, фільм «Пад шэрым небам» распавядае гісторыю рэпрэсаванай журналісткі «Белсату» Кацярыны Андрэевай і яе мужа, журналіста Ігара Ільяша. Яны застаюцца палітычнымі зняволенымі ў Беларусі. 

Тры ўзнагароды таксама атрымаў міні-серыял «Працэсы» – праект тэлеканала «Белсат». Стужка перамагла ў намінацыях «Найлепшы сцэнар» (Андрэй Кашперскі і Міхаіл Зуй), «Найлепшае мастацкае рашэнне» (Аляксандр Адамаў) і «Найлепшы мантаж» (Ілля Бажко).

Фільм «Святая вада» (Holy Water) рэжысёра Андрэя Куцілы і вытворчасці Белсату прызнаны найлепшым дакументальным кароткаметражны фільмам.

У намінацыі «Дакументальны рэпартаж» адзначылі «Без рэтушы: Сяргей Пукст» Аляксандра Гарадка і Канаплёва+Лейдзік.

Канаплёва+Лейдзік на ўручэнні прэміі «Чырвоны верас». Фота прадастаўлена арганізатарамі

Поўны спіс лаўрэатаў прэміі «Чырвоны верас»

Найлепшы ігравы поўнаметражны фільм

• «Пад шэрым небам» Мары Тамковіч

Найлепшы ігравы кароткаметражны фільм

• «Say Cheese» Кіры Альшэўскага

Найлепшы дакументальны поўнаметражны фільм

• «Радзіма» Ганны Бадзякі і Аляксандра Міхалковіча

Найлепшы дакументальны кароткаметражны фільм

• «Святая вада» Андрэя Куцілы

Найлепшы анімацыйны фільм

• «Кроў і караоке» Юрыя Сямашкі

Найлепшы дакументальны рэпартаж

• «Без рэтушы: Сяргей Пукст» Аляксандра Гарадка і Канаплёва+Лейдзік

Найлепшы(ая) рэжысёр(ка)

• Ганна Бадзяка і Аляксандр Міхалковіч за фільм «Радзіма»

Найлепшы актор

• Валянцін Навапольскі за ролю ў фільме «Пад шэрым небам»

Найлепшая акторка

• Аляксандра Вайцяховіч за ролю ў фільме «Пад шэрым небам»

Найлепшая праца аператара(кі)

• Сяргей Канаплянік за фільм «Радзіма»

Найлепшы сцэнар

• Андрэй Кашперскі і Міхаіл Зуй за фільм «Працэсы»

Найлепшае мастацкае рашэнне (праца мастака(чкі)-пастаноўшчыка(цы)

• Аляксандр Адамаў за фільм «Працэсы»

Найлепшы мантаж

• Iлля Бажко за фільм «Працэсы»

Найлепшы саўнддызайн (праца кампазітара(кі) і/ці гукарэжысёра(кі)

• Праект «Крос-культурны музычны дыялог» за фільм «Чароўныя нажнічкі»

Адкрыццё года

• Ананімны ўдзельнік

Лаўрэаты прэміі «Чырвоны верас». Фота прадастаўлена арганізатарамі

Таксама былі ўручаныя дзве «Спецыяльныя згадкі»:

• Стваральнікам фільму «Чароўныя нажнічкі» – «За руплівую працу – збор, захаванне і
  ўзнаўленне страчанай часткі нашай спадчыны – культуры беларускага габрэйства, і праз іх – за
  дапаўненне і ўзбагачэнне беларускасці»;
• Беларускім палітвязням – «У гонар шматлікіх палітзняволеных і іхных трагічных лёсаў, якія не
  дазваляюць рэжысёрам маўчаць і прымушаюць апавядаць свету пра беларускую сучаснасць і
  траўматычнае мінулае» (перададзеная ў Музей Вольнай Беларусі).