Стала вядома, што журналіст Алег Супрунюк накіраваны ў ПК-15 і мае праблемы з прычыны інваліднасці

Асуджанага за прафесійную дзейнасць журналіста Алега Супрунюка накіравалі адбываць прысуд у магілёўскую калонію № 15. Былы палітвязень Аляксандр Фядута, які быў вызвалены з той самай калоніі і дэпартаваны з Беларусі ў снежні мінулага года, распавёў, як перастрэўся з Алегам Супрунюком.

Журналіст Алег Супрунюк. Фота: з асабістага архіва

Паводле слоў Аляксандра Фядуты, ён двойчы размаўляў з Алегам Супрунюком у лістападзе 2025 года.

Аказалася, што журналісту, які мае інваліднасць па слыху, у калоніі не далі магчымасці карыстацца слыхавым апаратам. З гэтай прычыны спадар Алег практычна нічога не чуў і меў вялізныя праблемы ў камунікацыі з іншымі людзьмі.

— Спачатку мы адзін аднаго не пазналі. Толькі на трэці дзень я запытаўся ў яго: «Вы — журналіст?». «А вы — Фядута?», — спытаў у адказ Алег Супрунюк. Слыхавога апарата ён не меў і быў цалкам глухі. Я размаўляў з ім так, каб ён мог чытаць па вуснах. Іншыя зняволеныя так, на жаль, не ўмеюць, і таму Супрунюку нават не было з кім паразмаўляць, — распавёў Аляксандр Фядута.

З тых кароткіх размоў спадар Аляксандр даведаўся, што за непрацяглы час знаходжання ў калоніі журналіст ужо пабываў у штрафным ізалятары.

У калоніі Алега Супрунюка размеркавалі падмятаць падлогу на вытворчасці. Гэта праца, якую звычайна даюць фізічна аслабленым вязням. Паводле слоў Фядуты, іншыя вязні ставяцца да яго добразычліва і спагадліва — разумеюць, што праз глухату і без слыхавога апарата яму цяжка камунікаваць. У вольны час Алег, як і усе, шмат чытае — «нават больш за іншых, бо бавіць час у размовах ён не можа, і таму застаецца практычна ў адзіноце».

Ці вырашылася з таго часу ў журналіста праблема з немагчымасцю карыстацца жыццёва важнай для яго медыцынскай прыладай — на сёння невядома.

Гісторыя Алега Супрунюка

Алег Супрунюк — 58-гадовы журналіст з Брэста. За час у прафесіі ён працаваў у газеце «Брестский курьер», анлайн-выданні «Пёршы рэгіён», супрацоўнічаў з іншымі незалежнымі выданнямі. Яго затрымалі ў студзені 2025 года, і амаль пяць месяцаў пра лёс журналіста нічога не было вядома.

Толькі на пачатку чэрвеня пракуратура Брэсцкай вобласці распаўсюдзіла інфармацыю, што ў суд накіраваная крымінальная справа, распачатая супраць жыхара Брэста паводле часткі 3 артыкула 361–1 Крымінальнага кодэкса. Ведамства не назвала імя і прозвішча абвінавачанага, толькі сцвярджала, што не пазней кастрычніка 2023 года мужчына ўвайшоў у склад «Беларускай асацыяцыі журналістаў», прызнанай «экстрэмісцкім фармаваннем» рашэннем КДБ ад 28 лютага 2023 года.

8 жніўня 2025 года Алег Супрунюк быў асуджаны да 3 гадоў пазбаўлення волі з адбыццём у калоніі агульнага рэжыму. Суд Брэсцкай вобласці прызнаў яго вінаватым ва «ўдзеле ў экстрэмісцкім фармаванні» (паводле ч. 3 арт. 361–1 КК РБ). У мінулым кастрычніку імя журналіста з’явілася на сайце МУС у пераліку асоб, «датычных да экстрэмісцкай дзейнасці». Беларуская праваабарончая супольнасць лічыць Алега Супрунюка палітычным зняволеным.