Ірына Акуловіч сыходзіць з пасады гендырэктаркі БелТА

Генеральная дырэктарка дзяржаўнага інфармацыйнага агенцтва БелТА Ірына Акуловіч вызвалена ад пасады ў сувязі з пераходам на іншую працу. Пра гэта паведаміў «Пул Первого».

Ірына Акуловіч. Фота: БелТА

Адпаведны ўказ Аляксандр Лукашэнка падпісаў 25 лістапада.

Ірына Акуловіч — ураджэнка Магілёва. У СМІ яна прыйшла з педагагічнай сферы. Дзяржагенцтва БелТА ўзначальвала з 2018 года. Яе прызначэнне азнаменавалася «справай БелТА» супраць журналістаў незалежных СМІ.

Да гэтага з 2009 года працавала дырэктаркай РУП «Тэлерадыёкампанія «Магілёў»». З 2016 па 2019 год была членам Савета Рэспублікі. Уваходзіць у санкцыйныя спісы Швейцарыі і Еўрапейскага саюза.

Дзе Акуловіч будзе працаваць далей, «Пул Первого» не паведамляе. Але адзначае, што будзе «вельмі нечаканы паварот».  Хто ўзначаліць дзяржаўнае інфармацыйнае агенцтва, таксама невядома.