У «экстрэмісцкі» спіс Мінінфарма ўключылі сацсеткі журналістаў Іллі Маліноўскага, Аляксандра Гойшыка і расійскага блогера Іллі Варламава

Міністэрства інфармацыі Беларусі 9 красавіка ў чарговы раз папоўніла на сваім сайце Рэспубліканскі спіс экстрэмісцкіх матэрыялаў.

Выява створана БАЖ з выкарыстаннем ШІ

У пералік забароненых да распаўсюду матэрыялаў унеслі Insta­gram-акаўнт журналіста і трэвэл-блогера Аляксандра Гойшыка. Старонку з назвай  alex_valacuga (ідэнтыфікатар instagram.com/alex_valacuga?igsh=eGZic3N0dHdjYjRl) 7 красавіка 2026 года паставіў лічыць «экстрэмісцкай інфармацыйнай прадукцыяй» суд Ушацкага раёна Віцебскай вобласці.  

У Беларусі супраць Гойшыка распачатая крымінальная справа па абвінавачанні ў абразу Аляксандра Лукашэнкі, летам 2025 года журналіста абвясцілі ў вышук.

Таксама 7 красавіка 2026 года той самы суд прызнаў «экстрэмісцкім» кантэнт старонкі ў Insta­gram журналіста-фрылансера Іллі Маліноўскага. Акаўнт мае назву malinov.kust  і ідэнтыфікатар instagram.com/malinov.kust?igsh=MW01aWhxNjU4MnVtYQ==.

«Экстрэмісцкай інфармацыйнай прадукцыяй» прызнаны і змест старонкі на платформе «Дзэн» з назвай «Илья Варламов» (ідэнтыфікатар https://dzen.ru/varlamov). Адпаведнае рашэнне 7 красавіка 2026 года  прыняў суд Ганцавіцкага раёна Брэсцкай вобласці.

Гэты інтэрнэт-рэсурс мае 383,5 тысяч падпісчыкаў. Яго стваральнік — расійскі журналіст і відэаблогер Ілля Варламаў. У Рэспубліканскі спіс экстрэмісцкіх матэрыялаў ужо ўключаны ягоны YouTube-канал, Telegram-канал, старонкі ў Insta­gram, X і «ВКонтакте».