Магілёўская пракуратура спыніла доступ да інтэрнэт-рэсурсаў «Хартыі’97» і Sapere Aude

У адпаведнасці з пастановай пракурора Магілёўскай вобласці Дзяржаўная інспекцыя Рэспублікі Беларусь па электрасувязі Міністэрства сувязі і інфармацыі абмежавала доступ да інтэрнэт-рэсурсаў c97.org і sapere.online.

Як паведаміла служба інфармацыі надзорнага ведамства, сайты c97.org і sapere.online размяшчалі «забароненую да распаўсюду інфармацыю».

У афіцыйным паведамленні не згадваецца, што c97.org — гэта сайт «Хартыі’97», грамадзянскай ініцыятывы, якая стала незалежным СМІ. Паводле ведамства, на гэтым рэсурсе размяшчаліся «заведама ілжывыя звесткі пра палітычнае становішча Рэспублікі Беларусь, прававое становішча яе грамадзян, а таксама матэрыялы і гіперспасылкі на матэрыялы, прызнаныя экстрэмісцкімі паводле рашэнняў судоў».

Сайт з ідэнтыфікатарам c97.org пакуль не ўключаны ў Рэспубліканскі спіс экстрэмісцкіх матэрыялаў. Але інтэрнэт-рэсурс з ідэнтыфікатарам charter97.org быў упершыню прызнаны «экстрэмісцкай інфармацыйнай прадукцыяй» яшчэ 7 ліпеня 2022 года. 30 ліпеня 2022 года «Хартыя’97» рашэннем МУС Беларусі была абвешчаная «экстрэмісцкім фармаваннем».

Sapere.online — гэта інтэрнэт-рэсурc праекта Sapere Aude «Школы грамадзянскай асветы» — некамерцыйнай арганіцыцыі, створанай з мэтай пашырэння дэмакратычных, грамадзянскіх і антываенных практык.

Магілёўская абласная пракуратура даводзіць, што на гэтым інтэрнэт-рэсурсе «апрача экстрэмісцкіх матэрыялаў размяшчаліся вынікі  грамадскіх апытанняў наконт стаўлення да грамадска-палітычнай сітуацыі ў краіне і да выбараў прэзідэнта Рэспублікі Беларусь», якія праводзіліся без атрымання дзяржаўнай акрэдытацыі.

На сайце Sapere Aude у ліку аўтараў згадваюцца Рыгор Астапеня, Аляксандр Дабравольскі, Віктар Марціновіч, Роза Турарбекава, Арцём Шрайбман.

А сярод сваіх экспертаў «Школа грамадзянскай асветы» пералічвае навукоўцаў, палітыкаў, заканадаўцаў і журналістаў з усяго свету, у тым ліку лаўрэатаў Нобелеўскай і Пулітцэраўскай прэмій. У прыватнасці, Алесь Бяляцкі, Адам Міхнік, Эн Эплбаўм, Людміла Аляксеева, Цімаці Гартан Эш і многія іншыя сусветнавядомыя асобы.