«Экстрэмісцкім фармаваннем» прызналі ініцыятыву Radio Plato

Інтэрнэт-радыёстанцыю Radio Pla­to дадалі ў «Пералік арганізацый, фармаванняў, індывідуальных прадпрымальнікаў, датычных да экстрэмісцкай дзейнасці».

Radio Pla­to. Скрыншот

Гэта незалежнае інтэрнэт-радыё, якое асвятляе дзейнасць  беларускіх музычных і мастацкіх праектаў  для сусветнай аўдыторыі.

Паводле інфармацыі на сайце Міністэрства ўнутраных спраў Беларусі ад 28 лістапада 2025 года, ініцыятыва «Radio Pla­to» прызнаная «экстрэмісцкім фармаваннем» паводле рашэння КДБ ад 20 лістапада 2025 года. І ў той жа дзень рашэнне займела законную сілу.

Сярод удзельнікаў і стваральнікаў «экстрэмісцкага фармавання» сілавікі называюць дзесяць чалавек. У рэестры пералічаныя:

Аляксандр Карняйчук, Павел Кірпікаў, Раман Балбуцкі, Ягор Пуйша, Аляксей Лабуновіч, Дзяніс Бярозавік, Філіп Купрыяновіч, Максім Заньчук, Андрэй Шынкароў, Аляксандр Рынкевіч.

На сайце МУС згадваюцца інтэрнэт-рэсурсы, праз якія нібыта здзяйсняецца «экстрэмісцкая» дзейнасць. Гэта інтэрнэт-сайт Radio Pla­to (ідэнтыфікатар radioplato.by), аднайменныя групы ў сацсетках Insta­gram (ідэнтыфікатар instagram.com/radio_plato?igsh=amdlMW51OGRwdzhp) і «ВКонтакте» (ідэнтыфікатар vk.com/radioplato), а таксама Telegram-канал  (ідэнтыфікатар https://t.me/radioplato).

Гэтыя самыя інтэрнэт-рэсурсы 26 лістапада 2025 года былі ўнесеныя ў Рэспубліканскі спіс экстрэмісцкіх матэрыялаў на сайце Мінінфармацыі. Іх пастанавіў лічыць «экстрэмісцкай інфармацыйнай прадукцыяй» суд Партызанскага раёна Мінска. Судовае рашэнне было вынесенае 19 лістапада – за дзень да таго, як ініцыятыву Radio Pla­to абвесцілі  «экстрэмісцкім фармаваннем».

Radio Pla­to працавала з 2018 года. Цяпер на сайце з’явілася паведамленне пра тое, што рэдакцыйны калектыў лічыць «экстрэмісцкі» статус адзнакай таго, што інтэрнэт-радыё і яго сацсеткі сталі «яшчэ адным маленькім элементам у аграменным каталогу сродкаў масавай інфармацыі, непажаданых для рэжыму». На дадзены момант інтэрнэт-радыё прыпыніла куратарскія шоў і прамыя трансляцыі, але яго па-ранейшаму можна слухаць у рэжыме «музычнага аўтамата».

Паводле дзеючага беларускага заканадаўства, асобы, прызнаныя ўдзельнікамі экстрэмісцкага фармавання, могуць быць прыцягнутыя да крымінальнай адказнасці па артыкулах «Стварэнне экстрэмісцкага фарміравання альбо ўдзел у ім» (артыкул 361–1 КК) ці за «Садзейнічанне экстрэмісцкай дзейнасці» (артыкул 361–4 КК). Санкцыі паводле гэтых артыкулаў — да 10 гадоў пазбаўлення волі.