Здымак беларускай фатографкі Ксеніі Галубовіч увайшоў у топ-20 брытанскага конкурсу Female in Focus

Беларуская дакументальная фатографка і кінематаграфістка Ксенія Галубовіч увайшла ў лік 20 пераможцаў прэстыжнага міжнароднага конкурсу Female in Focus, зладжанага The British Jour­nal of Pho­tog­ra­phy. 

«Reflec­tion on the Past» («Адлюстраванне мінулага» / «Разважанне пра мінулае»)». Фота: Ксенія Галубовіч

Яе праца «Reflec­tion on the Past» («Адлюстраванне мінулага» / «Разважанне пра мінулае»), зробленая ў прыфрантавым Харкаве, стала адным з наймацнейшых выказванняў на тэму «On the Cusp» («На мяжы»).

Гісторыя аднаго здымка: 20 км ад фронту

Здымак, які скарыў міжнароднае журы, паказвае Алу — жыхарку хоспіса для людзей, эвакуяваных з акупаваных і небяспечных раёнаў Украіны. Хоспіс месціцца ў Харкаве, усяго ў 20 кіламетрах ад лініі фронту.

На фота Ала трымае ў руках люстэрка. У сітуацыі, калі рэальнасць вакол занадта жорсткая, а памяць пачынае згасаць, люстэрка становіцца адной з кропак апоры. Як адзначаецца ў апісанні да працы, Але ўжо цяжка арыентавацца ў тым, што адбываецца зараз, але яна па-ранейшаму любіць распавядаць пра сваю сям’ю. Маленькае адлюстраванне ў руках становіцца парталам у мірную мінуўшчыну, якую не можа разбурыць нават блізкасць фронту.

Пра конкурс і гендарную няроўнасць

Female in Focus — гэта прэмія, заснаваная The British Jour­nal of Pho­tog­ra­phy ў партнёрстве з Nikon, каб падтрымаць жанчын-фатографак. Статыстыка індустрыі застаецца няўцешнай:

• Жанчыны ў фатаграфіі зарабляюць на 30% менш, чым іх калегі-мужчыны.

• 55% апытаных фатографак сутыкаліся з гендарнай дыскрымінацыяй.

• Сярод пераможцаў найбуйнейшых сусветных фотапрэмій за апошнія 5 гадоў жанчын — толькі 34%.

Сёлета пераможцаў выбірала экспертнае журы, у склад якога ўвайшлі Алесія Главіяна (Glob­al Head of Vogue Italia) і Луіза Федотаў-Клементс (дырэктарка Pho­toworks).

Ксенія Галубовіч: Я магу назваць сябе феміністкай, але не настолькі радыкальнай, каб не гаварыць з мужчынамі

Выставы ў Лондане і галасаванне

Праца Ксеніі Галубовіч будзе прадстаўлена на дзвюх маштабных выставах: у Лондане ў 10.14 Gallery: з 24 красавіка па 29 мая 2026 года. А таксама ў Inter­na­tion­al Cen­tre for the Image: з 10 верасня па 25 кастрычніка 2026 года.

Цяпер арганізатары адкрылі галасаванне ў катэгорыі People’s Choice. Пераможца глядацкіх сімпатый атрымае магчымасць даць падрабязнае інтэрв’ю для платформы 1854.photography.

Падтрымаць Ксенію Галубовіч і прагаласаваць за яе здымак можна па спасылцы.