Выйшаў на волю спартыўны журналіст Дзмітрый Сельвяструк

Як стала вядома праваабаронцам, 7 сакавіка 2026 года з калоніі вызваліўся журналіст Дзмітрый Сельвяструк, цалкам адбыўшы тэрмін прысуду.

Яго Telegram-канал «Серебряный век. Футбол Беларуси» 22 сакавіка «ажыў» пасля амаль трохгадовага перапынку. А 10 красавіка абнавіўся допісам:

«Добры дзень. Піша аўтар канала. Усім дзякуй, хто не забыўся. Мне пакуль што вельмі цяжка ў сябе прыйсці, але я працую над гэтым. Па магчымасці сачыў за нашым футболам. Засмучаны, калі шчыра, але і пазітыву хапае. Кідаць канал я не хачу. Таму чакайце новых пастоў, хаця пакуль і цяжа даецца ўсё».

Дзмітрыю Сельвяструку 36 гадоў. Ён скончыў факультэт журналістыкі Белдзяржуніверсітэта, некаторы час працаваў у дзяржаўнай «Народнай газеце», займаўся сацыяльнай тэмай, пісаў пра ІТ-індустрыю. Паступова пераарыентаваўся на спартыўныя навіны, пачаў супрацоўнічаць са спецыялізаваным рэсурсам Football.by. Тры гады таму запусціў уласны праект — Telegram-канал пра беларускі футбол «Серебряный век. Футбол Беларуси».

Журналіста затрымалі 10 траўня 2023 года.

Спачатку двойчы каралі адміністрацыйным арыштам па абвінавачанні ў распаўсюдзе «экстрэмісцкай» інфармацыйнай прадукцыі. Першы працэс прайшоў у судзе Маскоўскага раёна Мінска, на ім старшыняваў суддзя Сяргей Кацар. 30 траўня журналіста зноў судзілі паводле ч. 2 арт. 19.11 КаАП, справу разбірала суддзя суда Маскоўскага раёна Мінска Таццяна Мотыль.

Пакуль Сельвяструк адбываў адміністрацыйныя арышты, яму выставілі і крымінальнае абвінавачанне паводле ч. 1 арт. 361–4 Крымінальнага кодэкса («Садзейнічанне экстрэмісцкай дзейнасці»).

У кастрычніку 2023 года ў Мінскім гарадскім судзе Дзмітрыя асудзілі да трох гадоў пазбаўлення волі. Працэс вяла суддзя Святлана Чарапанава.

Чытачы Telegram-канала «Серебряный век. Футбол Беларуси» выказвалі меркаванні, што падставай для затрымання Сельвяструка маглі стаць крытычныя допісы на адрас некаторых клубаў чэмпіянату краіны і спартыўных кіраўнікоў. Паводле назіранняў падпісчыкаў Telegram-канал часта паведамляў розныя інсайды, заснаваныя на чутках і каментарах з розных спартыўных форумаў.

17 кастрычніка 2023 года беларускія праваабаронцы прызналі Дзмітрыя палітвязнем.

8 снежня 2023 года МУС унёс Сельвяструка ў «Пералік грамадзянаў Рэспублікі Беларусь, замежных грамадзян і асоб без грамадзянства, датычных да экстрэмісцкай дзейнасці».