Рэжысёр з ЗША: «Вырашыў далучыцца да Марафону салідарнасці, каб падтрымаць Ларысу Шчыракову»

— Калі я пабачыў пасты Святланы Ціханоўскай і Паўла Латушкі ў Insta­gram (з акцыі на фэсце «Тутака» ў Польшчы), — напісаў Эрні Барбараш, — то вырашыў далучыцца да Марафону салідарнасці. Выбраў фота Лоры Шчыраковай, з якой рэгулярна камунікаваў з 2021 года, пакуль яе не забралі… Які жах…

Эрні Барбараш — рэжысёр і сцэнарыст, які нарадзіўся ў Адэсе ў 1977 годзе. Разам з бацькамі ён пераехаў у Канаду, цяпер жыве і працуе ў Лас-Анджалесе (ЗША). Кожны тыдзень ён публікуе ў сацсетках гісторыю аднаго з беларускіх палітвязняў. А летась зрабіў мазаіку з карціны «Узяцце Бастыліі», выкарыстаўшы фотаздымкі тых, хто знаходзіцца за кратамі.

— Ёсць шэраг фактараў, якія трымаюць мяне матываваным, — расказаў Эрні Барбараш у інтэрв’ю «Вясне». — Галоўнае — гэта самі зняволеныя, гераізм бязвінных людзей, пасаджаных толькі за тое, што выходзілі на пратэст, іх гісторыі — пачынаючы ад актыўнага супраціву рэжыму і заканчваючы абсурдам зняволення за каментар у сацсетках. Я адчуваю, што мы абавязаныя працягваць барацьбу дзеля іх. Яны адстойвалі тое, што лічылі правільным, і былі за гэта разгромленыя. Яны не могуць змагацца знутры — але мы тут, мы вольныя, наш абавязак — працягваць барацьбу. Несправядлівасць і вар’яцтва таго, што адбываецца з людзьмі ў Беларусі, у сучаснай краіне ў цэнтры Еўропы, прымушае мяне гневацца. Чым больш я чытаю і чую пра гэтых людзей і іх сем’і, якія засталіся без іх, тым больш я хачу дапамагчы.

Нагадаем, Марафон салідарнасці з беларускімі палітзняволенымі рэпарцёрамі стартаваў у Вільні 3 траўня з сумеснай акцыі Беларускай асацыяцыі журналістаў і Саюза журналістаў Літвы.

Да акцыі ўжо далучыліся ў Германіі, Швецыі, Фінляндыі, Даніі ды іншых краінах.

БАЖ заклікае калег ва ўсім свеце падтрымаць акцыю салідарнасці!

Вы можаце раздрукаваць ПАРТРЭТЫ зняволеных калег, сфатаграфавацца з імі ў пазнавальных месцах вашага горада (не ў Беларусі) і апублікаваць у сацыяльных сетках з тэгамі #СвабодуЖурналістам і #BecauseThe­Jour­nal­ist, а таксама даслаць нам на адрас office@baj.media ці intercomm@baj.media .

#СвабодуЖурналістам
#BecauseThe­Jour­nal­ist

А ў суботу, 29 ліпеня, пройдзе анлайн-марафон салідарнасці «Нам не ўсё адно!», падчас якога можна будзе фінансава падтрымаць палітвязняў. У мерапрыемстве прымуць удзел больш за 20 незалежных СМІ. БАЖ таксама далучыцца да акцыі. Трансляцыя будзе весціся адначасова на шматлікіх незалежных YouTube-пляцоўках з 10‑й ранку да 10‑й вечара па мінскім часе.

Чытайце яшчэ:

У суботу — анлайн-марафон салідарнасці «Нам не ўсё адно!» Сабраныя грошы пойдуць на падтрымку палітвязням і іх родным

Акцыя на фэсце «Тутака»: Ціханоўская, Латушка, Івулін і іншыя падтрымалі зняволеных журналістаў

«За кратамі ўвесь час марыў пра дранікі». Леанід Судаленка пра першыя дні на волі