«Забароненыя тэксты» беларускіх журналістаў і журналістак прагучалі ў Швецыі

Шведскія пісьменнікі і журналісты выказалі сваю салідарнасць са зняволенымі беларускімі журналістамі. У кастрычніку ў шведскім Мальмё прайшла акцыя салідарнасці «Цэнзура ў Беларусі — забароненыя тэксты», якую арганізавалі ПЭН-клуб і бібліятэка Daw­it Isaak у горадзе Мальмё ў рамках тыдня падтрымкі забароненай культуры.

Удзельнікі акцыі салідарнасці «Цэнзура ў Беларусі — забароненыя тэксты» сфатаграфаваліся з партрэтамі зняволеных беларускіх журналістаў. Фота: Оса Олсан

Спікеркай на мерапрыемстве выступіла пазаштатная журналістка Оса Олсан, якая расказала прысутным пра сітуацыю з медыя ў Беларусі і прыводзіла прыклады цэнзураваных матэрыялаў. Оса Олсан распавяла пра зняволеных сябраў Беларускай асацыяцыі журналістаўі беларускіх незалежных журналістаў і журналістак у выгнанні.

Журналісты Маргарэта Флігт, Моа Скімуціс і Торб’ёрн Халлгрэн прачыталі перад прысутнымі артыкулы са спісу забароненых матэрыялаў і тэксты, што апісваюць жыццё калег па абодва бакі мяжы Беларусі. 

Па стане на 24 кастрычніка ўжо 36 медыйшчыкаў знаходзяцца за кратамі.

Гэта не першая акцыя салідарнасці шведскіх журналістаў з беларускімі медыйшчыкамі. На пачатку сакавіка ў арт-музеі шведскага Мальмё ў межах акцыі «Рэха жаночых галасоў» узгадвалі і палітзняволеных журналістак Беларусі. Пры садзейнічанні Беларускай асацыяцыі журналістаў ПЭН-клуб горада распавёў пра дзевяць медыйшчыц, якія зараз знаходзяцца за кратамі, а таксама  агучыў цытаты з апошняга слова ў судзе галоўнай рэдактаркі агенцтва БелаПАН Ірыны Леўшынай.

У лістападзе ў Мальмё запланаваныя чарговыя акцыі Марафона салідарнасці з беларускімі журналістамі пад назвай «Адкрытае слова ў часы цішыні». Іх арганізуе сетка па абмену паміж БАЖ і SJF (Шведскі саюз журналістаў) і ПЭН-клуб.

БАЖ заклікае калег ва ўсім свеце падтрымаць акцыю салідарнасці! Вы можаце раздрукаваць партрэты зняволеных калег, сфатаграфавацца з імі ў пазнавальных месцах вашага горада (не ў Беларусі) і апублікаваць у сацыяльных сетках з тэгамі #СвабодуЖурналістам і #BecauseThe­Jour­nal­ist, а таксама даслаць нам на адрас office@baj.media ці intercomm@baj.media.