Tribuna.com і яшчэ два медыя далучыліся да Кодэкса этыкі беларускіх журналістаў

Спартовае медыя Tri­buna.com далучылася да Пагаднення аб самарэгуляванні незалежнага медыясектара і да Кодэкса этыкі беларускіх журналістаў.

Tri­buna.com (таксама вядомая як «Трыбуна») – гэта буйны міжнародны спартыўны лічбавы партал і супольнасць для заўзятараў, запушчаны ў 2010 годзе. Платформа асвятляе сусветныя спартыўныя падзеі, дае статыстыку і абʼядноўвае аматараў спорту з усяго свету.

Таксама да Пагаднення і Кодэкса далучыліся два іншыя медыя, якія не называюцца з прычыны бяспекі.

Усяго да Пагаднення аб самарэгуляванні незалежнага медыясектара і да Кодэкса этыкі беларускіх журналістаў на сёння далучыліся 33 медыя, якія працягваюць працаваць на беларускую аўдыторыю, незалежна ад таго, дзе знаходзяцца: у Беларусі ці за мяжой. У ліку падпісантаў – «Белсат», «Новы Час», «Еўрарадыё», Reform.news, «Позірк», Hrod­na.life, «Будзьма беларусамі!», NEXTA, Беларускі расследавальніцкі цэнтр і многія іншыя.

Падпісанты абавязваюцца прытрымлівацца ў сваёй прафесійнай дзейнасці Кодэкса этыкі беларускіх журналістаў і выконваць іншыя абавязкі, прадугледжаныя гэтым Пагадненнем.

Рада па медыяэтыцы