Журналіста Паўла Дабравольскага прыгаварылі да 9 гадоў пазбаўлення волі

Мінскі гарадскі суд 6 сакавіка вынес вырак палітзняволенаму журналісту Паўлу Дабравольскаму. Яго абвінавацілі ў «здрадзе дзяржаве».

Павел Дабравольскі. Фота: з асабістага архіва

Судовы працэс над журналістам пачаўся 27 лютага 2026 года і праходзіў у закрытым рэжыме.

Як стала вядома БАЖ, 6 сакавіка Мінскі гарадскі суд прызнаў Паўла Дабравольскага вінаватым паводле часткі 1 артыкула 356 Крымінальнага кодэкса РБ і прыгаварыў да 9 гадоў пазбаўлення волі з адбыццём у калоніі ва ўмовах строгага рэжыму.

Павел Дабравольскі адмовіўся абскарджваць прысуд. З улікам часу, які журналіст прабыў у СІЗА, тэрмін зняволення складзе прыблізна 7 гадоў і 4 месяцы.

Паводле звестак БАЖ, абвінавачанне ў «дзяржаўнай здрадзе» звязанае з журналісцкімі публікацыямі Дабравольскага.

Раней ён працаваў як на беларускія, так і на замежныя СМІ, у тым ліку на ўкраінскі часопіс NV.ua (да пачатку поўнамаштабнага ваеннага ўварвання Расіі ва Украіну). Апошняе месца працы ў Беларусі — незалежная інфармацыйная кампанія БелаПАН.

Павел Дабравольскі быў затрыманы ў Мінску 22 студзеня 2025 года — праз некалькі месяцаў пасля вяртання на радзіму з‑за мяжы.

Увосень 2025 года Павел Дабравольскі быў пераведзены з СІЗА КДБ, дзе яго ўтрымлівалі пасля затрымання, у СІЗА № 1.

З Беларусі Павел з’ехаў на пачатку восені 2021 года. Паводле інфармацыі на яго старонках ў сацыяльных сетках, пасля ад’езду падарожнічаў па свеце: аб’ехаў шэраг еўрапейскіх краін, быў у Іране, Расіі, краінах Паўднёвай Амерыкі. У кастрычніку 2024 года вярнуўся ў Мінск.

Падчас паслявыбарчых пратэстаў 2020 года Паўла Дабравольскага затрымлівалі і прыцягвалі да адміністрацыйнай адказнасці ў сувязі з ажыццяўленнем прафесійнай дзейнасці.

У прыватнасці, 30 кастрычніка 2020 года журналіст быў затрыманы ў сваёй кватэры і затым арыштаваны на 15 сутак па абвінавачанні ва ўдзеле ў несанкцыянаваным мітынгу.

Беларуская праваабарончая супольнасць прызнала Паўла Дабравольскага палітычным вязнем.

12 студзеня за кратамі СІЗА журналіст сустрэў свае 36 гадоў.

Паводле звестак Беларускай асацыяцыі журналістаў, на сёння ў Беларусі ў няволі ўтрымліваюцца 28 супрацоўнікаў беларускіх СМІ.