Сілавікі стварылі ў Telegram фэйкавы бот гомельскага незалежнага анлайн-выдання «Флагшток»

Праз яго спрабуюць выведаць стаўленне карыстальнікаў да вайны ва Украіне і асабістую інфармацыю пра іх.

Скрыншот

З’яўленне фэйкавага бота заўважылі супрацоўнікі рэдакцыі.

«Пасля першага паведамлення бот фіксуе ваш ID, а потым да перапіскі падлучаецца супрацоўнік спецслужб, які спрабуе выведаць асабістую інфармацыю», —піша Telegram-канал «Флагшток-Гомельшчына».

У выданні падкрэсліваюць, што яно ніколі не выкарыстоўвае ботаў і мае ў Telegram адзіны афіцыйны кантакт для таго, каб інтэрнэт-карыстальнікі маглі паведаміць навіну ці звязацца з рэдакцыяй.

«Флагшток» — гэта беларускае незалежнае рэгіянальнае інтэрнэт-выданне, заснаванае ў Гомелі ў 2020 годзе. Назва праекта ўзнікла як рэакцыя на грамадскія пратэсты супраць будаўніцтва ў абласным цэнтры 60-метровага флагштока дзяржаўнага сцяга. Выданне асвятляе грамадска-палітычныя і эканамічныя падзеі ў рэгіёне, фіксуе выпадкі карупцыі і парушэнняў правоў чалавека.

Улады Беларусі прызналі інтэрнэт-рэсурсы выдання «экстрэмісцкімі матэрыяламі», а само медыя — «экстрэмісцкім фарміраваннем». Праз крымінальны пераслед і ціск з боку беларускіх уладаў каманда вымушана працаваць за мяжой.