Дакументальны фільм «Белсату» пакажуць на фестывалі кіно ў Варшаве

Кадр з фільму «Казка» Якуба Станкевіча. Фота: Белсат

Паказваць фільмы пад адкрытым небам пачнуць 8 ліпеня. Аматарам кіно да 9 верасня пакажуць 20 фільмаў, большасць з якіх сталіся пераможцамі буйных фестываляў свету (Венецыянскага, Берлінале, Лёкарна, Карлавы Вары), не былі ў кінапракаце, але некалькі разоў паказваліся ў межах польскіх прэм’ераў. У праграме – поўнаметражныя мастацкія карціны, дакументальныя і эксперыментальныя жанры ўкраінскага, беларускага, в’етнамскага, індыйскага, грузінскага і, упершыню, балгарскага кінематографу.

«Кіно, мовы і гісторыі з розных куткоў свету сустрэнуцца пяты раз», – распавядаюць арганізатары.

«Пад агульным небам» – гэта прагляд фільмаў, які стварае «прастору для міжкультурнага дыялогу». Праект зʼявіўся ў 2022 годзе і ладзіцца Цэнтрам думкі Яна Паўла II.

Падзеі пройдуць у двары гістарычнага шматкватэрнага дому на адрасе Фоксаль, 11 (Fok­sal, 11). Уваход вольны.

Крытык vs Блогер: Хто фармуе культурны парадак дня сучаснай Беларусі?

Што пакажуць беларусы

Беларускі кінавечар, медыйным партнёрам якога стаўся «Белсат», пройдзе 15-га ліпеня. Гледачы ўбачаць ігравы фільм Юрыя Сямашкі «Лебядзіная песня Фёдара Азёрава». Гэта гісторыя 25-гадовага маладога музыкі, які марыць пра поспех, пакуль медыі прадказваюць Трэцюю сусветную вайну, а ягоная сястра бярэ ўдзел у пратэстах. У 2025 годзе карціна атрымала спецыяльную прэмію чытачоў Tagesspiegel на Берлінскім міжнародным кінафестывалі, а таксама спецыяльную прэмію сімпатыяў гледачоў і прэмію маладога журы на фестывалі аўтарскага кіно ў Мадрыдзе.

Падчас другога паказу ў гэты дзень можна будзе ўбачыць новую дакументальную працу «Белсату» — «Казка» Якуба Станкевіча. Яна раскажа пра мастака з Падляшша, які жыве ў зямлянцы ў вялікім лесе. Як любая казка, гісторыя адначасова аптымістычная, містычная і трагічная.

Кадр з фільму «Казка» Якуба Станкевіча. Фота: Белсат

«Віктар – сам частка гэтага лесу. Ён нарадзіўся ў вёсцы, якая жыла гэтак жа, як стагоддзі таму. І хоць яна знікла незваротна, усё роўна гучыць у яго свядомасці. Гістарычныя раны раняць Віктара настолькі, што яму даводзіцца выказваць свой боль праз выявы», – гаворыцца ў апісанні дакументалкі.

Паводле арганізатараў праекту, кожны вечар – «гэта паўнацэнны культурны і адукацыйны вопыт». Перад гледачамі спачатку выступяць эксперты, якія прапануюць сацыяльна-палітычны кантэкст, інтэрпрэтатыўныя ключы і падрыхтоўку да інфармаванага ўспрымання. Пасля фільмаў праходзяць дыскусіі з удзелам кінематаграфістаў і экспертаў. Запланаваныя таксама сустрэчы з рэжысёрамі.

«Талака. Будуем Мрою». «Белсат» запускае ўвосень дакументальны серыял