Прэмію імя Паліткоўскай прысудзілі зняволеным у РФ украінскім і расійскім журналісткам

Арганізатары таксама адзначылі крымскую журналістку Ірыну Даніловіч. Яна знаходзіцца пад вартай у Расіі з красавіка 2022 года, суд прыгаварыў яе да сямі гадоў калоніі. Журналістку катавалі і ўтрымлівалі ў бесчалавечных умовах, што прывяло да значнага пагаршэння стану яе здароўя.

«Ее было невозможно остановить». История украинской журналистки Виктории Рощиной, которую убил российский плен

Лаўрэаткамі прэміі імя Паліткоўскай таксама сталі зняволеныя расійскія журналісткі. У прыватнасці, арганізатары назвалі Дар’ю Шыпачову. У РФ яе прыгаварылі да 12 гадоў пазбаўлення волі па справе аб «дзяржаўнай здрадзе». Прэміяй адзначылі і Марыю Панамарэнка, якую прыгаварылі да 6,5 года калоніі за публікацыю пра бамбардзіроўку Марыупальскага драмтэатра. Яна працягвае выступаць супраць вайны ў калоніі і некалькі разоў спрабавала здзейсніць самагубства.

Таксама арганізатары згадалі іншых расійскіх журналістак, якія працягваюць знаходзіцца ў зняволенні, — Вольгу Комлеву, Антаніну Фаворскую, Ніку Новак, Васілісу Шышкіну, Аляксандру Аляксандраву, Алу Донгур-Оол, Капіталіну Аверыну, Наталлю Лазарычаву і Алену Матушэўскую.

«Намінацыйны камітэт прэміі імя Ганны Паліткоўскай RAW in War за 2026 год адзначае мужнасць і сумленнасць украінскіх і расійскіх журналістак, якія рызыкавалі сваёй свабодай і нават жыццём, каб асвятляць вайну і выступаць супраць парушэнняў правоў чалавека, ваенных злачынстваў і ўзмацнення рэпрэсій у дачыненні да журналістаў, праваабаронцаў і тых, хто выступае супраць вайны ў Расіі», — гаворыцца на сайце RAW in War.

Адна з чальцоў камітэта па вылучэнні кандыдатак на прэмію 2026 года, беларуская пісьменніца і лаўрэатка Нобелеўскай прэміі Святлана Алексіевіч, заклікала памятаць імёны журналістак, «якія апынуліся ў руках катаў». «Калі яны ўжо не могуць пісаць ручкай, яны пішуць рэпартажы сваім жыццём», — падкрэсліла Алексіевіч.

Арганізатары заклікалі расійскі ўрад неадкладна і безумоўна вызваліць журналістак, каб яны маглі бяспечна працягваць сваю працу. Паколькі многія з іх падвяргаліся ў турмах катаванням, у тым ліку сексуальнаму гвалту, усе вінаватыя павінны быць прыцягнутыя да адказнасці, падкрэслілі ў RAW in War.

Прэмія імя Ганны Паліткоўскай была заснаваная ў 2007 годзе міжнароднай няўрадавай арганізацыяй RAW in War. Яна названа ў гонар журналісткі «Новой газеты» Ганны Паліткоўскай, забітай 7 кастрычніка 2006 года. Узнагарода штогод уручаецца жанчынам — праваабаронцам і журналісткам, якія працуюць у зонах ваенных канфліктаў і рызыкуюць уласнай бяспекай.