Праваабаронцы заклікаюць далучацца да Тыдня супраць смяротнага пакарання

Прадстаўнікі кампаніі «Праваабаронцы супраць смяротнага пакарання ў Беларусі» пачалі актыўную падрыхтоўку да Тыдня супраць смяротнага пакарання, які пройдзе 5–10 кастрычніка 2026 года.

Фота: Вясна

Традыцыйна ў гэтыя дні ва ўсім свеце праходзяць мерапрыемствы, прысвечаныя адмене смяротнага пакарання, і Беларусь таксама павінна гучаць у гэтай міжнароднай размове.

«Наша мэта — расказаць як мага большай колькасці беларусаў, беларусак і замежнай аўдыторыі пра тое, што Беларусь застаецца адзінай краінай у Еўропе, дзе ўсё яшчэ прымяняецца смяротнае пакаранне, і чаму яго адмена важная»,— адзначаюць праваабаронцы.

Калі вы хочаце далучыцца да Тыдня, кампанія «Праваабаронцы супраць смяротнага пакарання ў Беларусі» будзе рада любому партнёрскаму і валанцёрскаму ўдзелу. Гэта можа быць арганізацыя з вашага боку:

• кінапаказу і абмеркавання;
• лекцыі, прэзентацыі або дыскусіі на тэму смяротнага пакарання;
• мерапрыемства ва ўніверсітэце, бібліятэцы, культурнай прасторы ці вашым горадзе;
• інфармацыйнай кампаніі;
• або любой іншай крэатыўнай ініцыятывы, якая дапаможа ўзняць гэтую тэму.

Праваабаронцы са свайго боку гатовыя дапамагчы:

• інфармацыйнай падтрымкай;
• экспертнымі кансультацыямі;
• матэрыяламі і мерчам;
• прасоўваннем вашага мерапрыемства і пошукам найлепшага фармату.

Калі ў вас ёсць ідэя або проста жаданне зрабіць нешта ў межах Тыдня супраць смяротнага пакарання — напішыце ў @niepakaranniu_bot.

«Давайце разам зробім так, каб тэма смяротнага пакарання зноў стала часткай грамадскай дыскусіі і прагучала як мага мацней».