Гродзенская дзяржгазета напісала пра візіт Ціханоўскай у Кіеў – карыстальнікі прымецілі распальванне варожасці

Дзяржаўная газета «Гродзенская праўда» прысвяціла некалькі пастоў у Threads візіту Святланы Ціханоўскай у Кіеў. Аўтары публікацый выкарыстоўвалі даволі рэзкія фармулёўкі – некаторыя каментатары звярнулі на гэта ўвагу.

Рэдакцыя «Гродзенскай праўды». Фота: яндэкс-карты

«Пратэрмінаваная Света», «кіраўнік змагароў» і «паказушнае ўскладанне каля магіл наёмных нацыкаў (зямля ім шклаватай)» — так супрацоўнікі «Гродзенскай праўды» апісалі візіт Ціханоўскай у Кіеў.

У каментары пад пасты прыйшло кіраўніцтва газеты: галоўная рэдактарка Таццяна Сяргеева, яе намесніца Анжаліка Кісляк, карэспандэнтка Мілана Дудко і Маргарыта Сяўко, а таксама аглядальніца Алена Худзік і рэдактарка інтэрнэт-рэсурсу газеты Анастасія Адосій.

Публікацыя “Гродзенскай праўды” ў Threads. Скрыншот Hrodna.life

Анжаліка Кісляк дзякуе Богу за тое, што ён «збераг нас ад такіх Свет». Падобную фармулёўку выкарыстоўвае і Маргарыта Сяўко.

Адзін з удзельнікаў абмеркавання выказаў здагадку: пост раскідалі па чатах вайбера, каб нагнаць каментатараў. «Не пі***і», – адказвае яму галоўная рэдактарка Таццяна Сяргеева. Адказваючы іншаму карыстальніку Сяргеева пажадала рака і дадала, што ў “адрас добрых людзей” гадасцяў не піша.

Каментарый галоўнай рэдактаркі “Гродзенскай праўды”. Скрыншот Hrodna.life

У каментарах ёсць удзельнікі абмеркавання, якія падтрымліваюць рыторыку газеты. Зрэшты, пакідаюць каментары і тыя, хто не згодны з фармулёўкамі супрацоўнікаў.

«Навіны скончыліся? Даўгунец адцераблі ўжо? Макрон не тэлефануе болей?» — піша адзін з каментатараў.

«А ці вам можна пісаць пра экстрэмізм? 15 сутак ці крыміналку не заробіце?» – цікавіцца іншы.

“Вам што Дзмітрый Мядзведзеў майстар-клас па капірайтынгу правёў?” – жартуе трэцяя каментатарка.

“Вельмі падобна на распальванне нянавісці па сацыяльнай прыкмеце”, – адзначае яшчэ адзін карыстальнік.

На гэтыя каментары супрацоўнікі не адказалі.

Святлана Ціханоўская прыехала ў Кіеў 25 лютага па запрашэнні Уладзіміра Зяленскага. Гэта яе першы візіт у краіну з 2020 году.

У рамках сустрэчы Ціханоўская прыме ўдзел у штогадовым Міжнародным саміце гарадоў і рэгіёнаў. Спікерка таксама наведала могілкі, дзе пахаваная 24-гадовая беларуская актывістка Марыя Зайцава.

Ідэолагі Гродна даплацяць дзяржгазеце за публікацыю віншаванняў