У «экстрэмісцкі» спіс Мінінфарм уключыў Instagram-старонкі DzikMedia, «Беларускае Радыё Рацыя» і Ганны Красулінай

Міністэрства інфармацыі Беларусі 23 кастрычніка чарговы раз папоўніла на сваім сайце Рэспубліканскі спіс экстрэмісцкіх матэрыялаў.

Фота: Беларускае Радыё Рацыя

У спіс у ліку іншых беларускія ўлады ўключылі старонку ў Insta­gram пад назвай Dzik­Me­dia (ідэнтыфікатар @media_dzik). Гэты інтэрнэт-рэсурс пазіцыянуе сябе як незалежнае медыя для беларусаў, у тым ліку вымушаных палітэмігрантаў, які воляю лёсу апынуліся ў Польшчы — у Беластоку і Варшаве.

22 кастрычніка 2026 года гэтую Insta­gram-старонку прызнаў «экстрэмісцкай інфармацыйнай прадукцыяй» суд Бабруйскага раёна і горада Бабруйска.

Таксама ў Рэспубліканскі спіс экстрэмісцкіх матэрыялаў унеслі старонку «Беларускае Радыё Рацыя» ў Insta­gram (ідэнтыфікатар @racyja). Гэтую  старонку 22 кастрычніка 2026 года прызнаў «экстрэмісцкай інфармацыйнай прадукцыяй» той самы суд Бабруйскага раёна і горада Бабруйска.

«Беларускае Радыё Рацыя» — гэта незалежнае беларускае медыя з Падляшша, якое ў радыёфармаце асвятляе навіны Беласточчыны і Беларусі. 16 студзеня 2024 года адпаведным рашэннем КДБ «Беларускае Радыё Рацыя» было прызнанае «экстрэмісцкім фармаваннем». За супрацоўніцтва з ім у Беларусі заводзяць крымінальныя справы.

Суд Бабруйскага раёна і горада Бабруйска 22 кастрычніка 2026 года пастанавіў лічыць «экстрэмісцкім» і кантэнт старонкі ў Insta­gram пад назвай Anna Kra­suli­na (ідэнтыфікатар @hanna.krasulina). Ганна Красуліна — палітычная актывістка і прэс-сакратар лідаркі беларускіх дэмакратычных сіл Святланы Ціханоўскай. Жыве ў вымушанай эміграцыі. 1 ліпеня 2024 года Мінскі абласны суд у межах завочнага судовага працэсу па «справе аналітыкаў Святланы Ціханоўскай» прысудзіў ёй 11 гадоў пазбаўлення волі.