Адкрыты набор у Інкубатар медыястартапаў «Публікуй! Камунікуй!» (дэдлайн — 10 чэрвеня)

Інкубатар — гэта праграма падтрымкі для беларускіх медыяпраектаў у выгнанні, якія ствараюць кантэнт, адрасаваны найперш аўдыторыі ўнутры Беларусі. Калі вы ўжо рэалізуеце такі праект (не больш за тры гады) альбо плануеце хутка яго распачаць — арганізатары запрашаюць запоўніць форму заяўкі на ўдзел у Інкубатары і атрымаць фінансавую падтрымку.

Праграма падтрымкі беларускіх медыяпраектаў і маладых журналістаў у выгнанні створана для тых, хто хоча ствараць якасную журналістыку, развіваць сваё медыя, хто ведае і адчувае, што цікава людзям у Беларусі. У межах праграмы будуць падтрыманыя праекты ў розных фарматах, адрасаваныя найперш беларусам унутры краіны.

Падтрымка будзе выдаткоўвацца на конкурснай аснове. На яе могуць прэтэндаваць як ужо існуючыя праекты, так і абсалютна новыя. У камандзе павінна быць не менш за тры чалавекі.

Асабліва вітаюцца жаночыя каманды, праекты з жанчынамі‑лідаркамі і праекты для жаночай аўдыторыі.

Дзве ўмовы: 

• Усе ўдзельнікі каманды павінны знаходзіцца па‑за межамі краіны на момант падачы заяўкі і рэалізацыі праекта.
• Неабходна стварыць не менш за дзесяць публікацый у межах інкубатара — і трымаць тэмп.

На рэалізацыю будзе выдаткавана паўгода.

Бюджэт — да 3 400 еўра на праект. Кампактны, мэтавы грант на хуткі запуск і рэальныя вынікі.

ПАДАЦЬ ЗАЯЎКУ

Інкубатар ладзяць Беларуская асацыяцыя журналістаў і The Free Media Cen­ter — некамерцыйная арганізацыя, створаная для падтрымкі медыя ў выгнанні, супрацьстаяння прапагандзе і дэзінфармацыі, а таксама для ўмацавання якаснай журналістыкі і свабоды сродкаў масавай інфармацыі. Праграма праводзіцца пры падтрымцы Міністэрства замежных спраў Германіі.