Конкурс J4T AWARDS 2026 (дэдлайн — 20 лістапада)

Штогадовы конкурс J4T AWARDS ладзіцца з мэтай павысіць прафесійныя навыкі працаўнікоў СМІ ў галіне роўнасці і недыскрымінацыі, паспрыяць развіццю сацыяльнай журналістыкі, павысіць пазітыўную бачнасць уразлівых групаў насельніцтва Беларусі.

Пераможцаў вызначаюць у трох намінацыях:

• Матэрыял на тэматыку роўнасці і недыскрымінацыі

У намінацыі прымаюцца артыкулы / фотарэпартажы / відэаматэрыялы / радыёперадачы, якія прасоўваюць ідэю роўнасці і недыскрымінацыі ўразлівых сацыяльных групаў у беларускім грамадстве.

Адзін аўтар можа падаць на конкурс не больш за тры працы.

Для ўдзелу неабходна запоўніць анлайн-форму не пазней як 20 лістапада 2026 года.

Каб улічвацца ў конкурсе, матэрыялы павінны быць апублікаваныя з 1 лістапада 2025 да 31 кастрычніка 2026.

Пераможцу вызначыць журы, у склад якога ўвойдуць рэдактаркі і рэдактары беларускіх СМІ. Першыя тры месцы будуць узнагароджаны ганаровымі граматамі, а пераможца атрымае адмысловы прыз: удзел у асветніцкай паездцы ў адну з краінаў Еўропы ў 2027 годзе.

• Рэдакцыя года

У намінацыі можа быць вылучаная рэдакцыя СМІ, якая ў сваіх матэрыялах прасоўвала ідэі роўнасці ды інклюзіі, распавядала пра праблемы, з якімі сутыкаюцца прадстаўнікі ўразлівых групаў у Беларусі і краінах рэлакацыі.

Пераможца выбіраецца праз галасаванне прадстаўнікоў НДА і індывідуальных актывістаў, якія працуюць з тэмай інклюзіі ўразлівых груп.

Сёлета вылучыць рэдакцыю можна праз Telegram-бот @j4t_awards_bot да 20 лістапада 2026 года ўключна.

Рэдакцыя-пераможца конкурсу атрымае ганаровую грамату і адмысловы прыз.

• Асоба года

Адмысловая намінацыя J4T за ўнёсак у развіццё ініцыятывы і праваабарончага руху ў Беларусі. Лаўрэата вызначаюць сябры каманды Праваабарончай ініцыятывы «Журналісты за талерантнасць».