dekoder і RAAM заклікалі ЕС падтрымаць незалежную прэсу Беларусі, Украіны і Расіі

Экспертные сайты dekoder (Германія) і Платформа RAAM (Нідэрланды) заклікалі Еўрапейскі Саюз выдзеліць сродкі на падтрымку незалежных СМІ рэгіёна.

Сцягі краін — удзельніц Еўразвяза. Фота ўзята з сайта platformraam.nl

14 траўня еўрапейскія экспертныя сайты dekoder і Платформа RAAM у сумесным звароце да ЕС выказалі заклапочанасць будучыняй незалежнай журналістыкі Беларусі, Украіны і Расіі. Яны заклікалі кіраўніцтва ЕС выдзеліць сродкі на падтрымку недзяржаўных медыяў з гэтых краін.

У звароце адзначаецца, што беларускія і расійскія медыі працуюць у выгнанні, украінскія СМІ змагаюцца супраць расійскай агрэсіі, — але ўсе яны знаходзяцца на мяжы выжывання.

Еўрапейскія выданні канстатуюць, што ва ўмовах эміграцыі і вайны немагчыма выжыць за кошт камерцыйнай дзейнасці. Разам з тым надзейныя і незалежныя крыніцы інфармацыі сёння важныя, як ніколі.

dekoder і Платформа RAAM згадваюць рашэнне новага прэзідэнта ЗША Дональда Трампа, якое не толькі «пагражае існаванню Радыё Свабодная Еўропа/Радыё Свабода (РСЕ/РС), але і аслабляе дзясяткі іншых уплывовых незалежных СМІ». А наступствы такога рашэння называюць «фундаментальнымі і драматычнымі».

Еўрапейскія медыі сцвярджаюць, што Еўропа без незалежных СМІ ў Беларусі, Украіне і Расіі наўрад ці зможа зразумець, што насамрэч адбываецца ўнутры гэтых краін. «У нас наўрад ці знойдуцца эфектыўныя інструменты і веды, каб супрацьстаяць расійскай дзяржаўнай прапагандзе і дэзынфармацыйным стратэгіям і дзейнічаць супраць іх», — гаворыцца ў звароце.

Ва ўмовах, калі ў Беларусі і Расіі дзейнічае толькі прапаганда, а незалежная журналістыка знаходзіцца пад забаронай, медыі ў выгнанні «цяпер часта з’яўляюцца адзіным сродкам атрымаць праўдзівую інфармацыю».

Гэтая пагражальная тэндэнцыя і вымусіла журналістаў і рэдактараў міжнародных СМІ, якія спецыялізуюцца на Украіне, Беларусі, Расіі, Каўказе, Малдове і Цэнтральнай Азіі, звярнуцца да Еўракамісіі, Еўрапейскай рады, асобных краін Еўропы з заклікам стварыць фонды для падтрымкі незалежнай журналістыкі ў гэтых краінах.

Падпісанты ліста лічаць, што падтрымка гэтай формы журналістыкі можа быць уключана ў план ReArm Europe Plan/Readiness 2030.

— У рэшце рэшт, у век гібрыднай вайны абаронная палітыка ўключае ў сябе не толькі зброю і асабісты склад войска. Для дэмакратычнага парадку, які Еўразвяз хоча абараняць, праўдзівая інфармацыя і плюралізм уяўляюць стратэгічны інтарэс для Еўропы, — гаворыцца ў звароце.