У «экстрэмісцкі» спіс Мінінфарма другі раз дадалі Threads-акаўнт Валера Руселіка

Міністэрства інфармацыі Беларусі 10 чэрвеня зноў папоўніла на сваім сайце Рэспубліканскі спіс экстрэмісцкіх матэрыялаў.

Валер Руселік. Фота Змітра Лукашука

Паводле дакумента, «экстрэмісцкай інфармацыйнай прадукцыяй» прызнаны акаўнт daro­ha ў сацсетцы Threads (ідэнтыфікатар @daroha.by).  Адпаведнае рашэнне прыняў 5 чэрвеня 2026 года суд Пінскага раёна і горада Пінска.

Гэта прыватны акаўнт журналіста і блогера, аўтара You­ube-канала Daro­ha Валера Руселіка. Змест старонкі нядаўна ўжо быў абвешчаны «экстрэмісцкім» — рашэннем суда Мінскага раёна Мінскай вобласці ад 17 красавіка 2026 года.

Яшчэ раней, 7 ліпеня 2023 года, суд Ленінскага раёна Гродна прызнаў  «экстрэмісцкай інфармацыйнай прадукцыяй» Telegram-канал daro­ha, Youtube-канал daro­ha, старонку ў Insta­gram з назвай daroha.by, старонку ў Face­book з назвай Daro­ha Via, Tik­Tok-акаўнт daro­ha і лагатып, выкарыстаны на гэтых інтэрнэт-рэсурсах.

2 жніўня 2023 года ўвесь праект Daro­ha быў прызнаны «экстрэмісцкім фармаваннем». Адпаведнае рашэнне прыняло Міністэрства ўнутраных спраў Беларусі. На сайце ведамства ў Пераліку арганізацый, фармаванняў, індывідуальных прадпрымальнікаў, датычных да экстрэмісцкай дзейнасці асобна пазначанае імя аўтара праекта — Руселіка Валерыя Віктаравіча.

Некалькі апошніх гадоў Валер Руселік жыве за мяжой. Ён быў вымушаны пакінуць Беларусь, на радзіме супраць яго заведзена крымінальная справа.