Для забеспячэння прысутнасці ў Беларусі Deutsche Welle робіць стаўку на тэхрашэнні, якія не пагражаюць бяспецы карыстальнікаў

Пра гэта гаворыцца ў праекце плана работы DW на 2026–2029 гады, апублікаваным прэс-службай Бундэстага (вяшчальнік фінансуецца з федэральнага бюджэту з магчымасцю прыцягнення спонсарскіх сродкаў).

Акрамя супрацоўніцтва з распрацоўшчыкамі VPN тыпу Psiphon ў 2026 годзе DW прапанавала out­line-VPN для мабільнага прыкладання DW Access, “спецыяльна створаны для зарэгуляваных лічбавых прастор”.

Прыярытэтамі найвышэйшага ўзроўню “А” ва Усходняй Еўропе вяшчальнік называе Расію і Украіну, ствараючы кантэнт адпаведна на рускай і ўкраінскай мовах. “Акрамя таго, прапановы ад DW ахопліваюць і іншыя стратэгічна важныя мэтавыя краіны, такія як Беларусь, Малдова і Грузія. Гэты рэгіён уяўляе сабой геапалітычна высокаадчувальную зону, дзе пытанні бяспекі, энэргетыкі і дэмакратычнай палітыкі непасрэдна ўплываюць на Германію і ЕС“, — падкрэсліваецца ў дакуменце.

Рэгіён характарызуецца таксама “расійскай агрэсіўнай вайной, аўтарытарным уздзеяннем і вельмі абмежаваным медыяполем”. “У Расіі пануюць рэпрэсіі, цэнзура і лічбавая ізаляцыя; у Беларусі незалежная журналістыка фактычна немагчымая“, — адзначае DW.

У сваю чаргу ўкраінскі медыяландшафт “таксама знаходзіцца пад значным ціскам з‑за вайны, эканамічных цяжкасцяў і палітычнага ўмяшання”. Пры гэтым Германія “адыгрывае важную ролю ў многіх краінах рэгіёну ў праекцыі на рэформы, стабілізацыю і эканамічнае супрацоўніцтва”.

Падкрэсліваецца, што “сфакусаваная інфармацыя“ з Беларусі і пра Беларусь, у т.л. на беларускай мове, транслюецца на тэлеканале “DW на рускай”. У месенджары “Тэлеграм“ і на відэахостынгу “Ютуб“ працуюць каналы “DW Беларусь”, функцыянуе навінавая рассылка па беларускай тэматыцы.

Акрамя таго, Акадэмія “Нямецкай хвалі“ (DW Akademie) падтрымлівае беларускія СМІ ў выгнанні ў рамках ініцыятывы “Ханна Арэнт” (1906–1975, нямецка-амерыканскі філосаф, заснавальнік тэорыі таталітарызму) знешнепалітычнага ведамства Германіі.

2 сакавіка 2022 года суд Цэнтральнага раёна Мінска прызнаў “экстрэмісцкім“ кантэнт інтэрнэт-рэсурсаў DW.

29 красавіка 2024 года беларускія ўлады рашэннем МУС прылічылі DW Беларусь да “экстрэмісцкіх фарміраванняў“.

Сайт DW у Беларусі заблакаваны з 28 кастрычніка 2021 года.

У праекце плана работы DW адзначаецца, што фінансаванне вяшчальніка будзе скарочана на 10,1 млн еўра ў 2026 годзе ў параўнанні з першапачатковымі разлікамі (з 425,5 да 414,4 млн еўра). На 2027 год пакуль запланаваны бюджэт 425,5 млн еўра, аднак у DW дапускаюць, што выніковая лічба апынецца на ўзроўні гэтага года. З улікам вымушанага добраахвотнага скарачэння выдаткаў у 2023 годзе больш чым на 20 млн еўра агульная сума, на якую можа скараціцца бюджэт за пяць гадоў, складзе каля 41 млн еўра, або 10%.